LAOAG CITY – Kalikagom ni Sang. Panlungsod Jeff Fariñas a maamuan no rumbeng kadi nga adaptaren pay laeng dagiti Barangay dagiti ordinansa nga i-em-emplimentar ti probinsia ken lokal a gobierno.
Namunganay daytoy a saludsod na kalpasan a nagturong isuna iti Barangay Mangato West ditoy ciudad ti Laoag, no sadinno a kalikagom ti nadakamat a barangay nga adaptaren ti panakamulta dagiti minors nga agdidrive ti motorsiklo ken dagiti agtutubo nga agus-usar ti vape.
Daytoy pay ti rason a kalikagom ti Sang. Panlungsod a pagsasaritaan daytoy nga isyu babaen ti committee on laws tapno maammuan no ania ti rumbeng nga aramiden da maipapan iti daytoy.
Nu pay kasta patien ni Fariñas a no adda metten ordiannsa ti gobierno national ken gobierno probinsial ket sakupen metten ti amin nga ili ken ciudad.
Mainaig iti daytoy ket imbatad met ni Liga ng mga Barangay President Arbee Ablan, ket maapresiar na dagiti addang dagiti barangay gapu ta adda initiatibo da para iti naan-anay a linak, talna ken urnos iti barangay da.
Patien pay ni Sang. Panlungsod Member Atty. Jason Perera ditoy ciudad ti Laoag a dakkel a tulong ti codification dagiti general ordinances tapno maamuan dagiti masapol a mai-implimentar.
Segun kenkuana ket tawenen ti napalabas idi ambuangay daytoy a polisiya, no sadinno a ti kada sangapulo a tawen ket masapo nga agisubmitir ti kada lokal a gobierno iti Department of the Interior and Local Government, a patien na a saan pay nga inaramid ti konseho.
Kas pagarigan dagiti ordinansa nga ita da laeng a naammuan.
Kabayatanna, manamnama a mapagsasaritaan pay daytoy nga isyu iti sumaruno a session tapno ammu da ti usto nga adda a rumbeng nga aramiden da.
