LAOAG CITY – Kalikagum ti konseho a maikkan ti signages ken mapabaro ti pinta dagiti amin nga aktibo a fire hydrants ditoy ciudad ti Laoag.
Segun ti presiding officer ti konseho ditoy ciudad, naobserbaran na a kas maysa kadagiti agresresponde no adda ti uram ket saan payen a malasin dagiti fire hydrant gapu ta nakurang dagiti signages ken maik-ikkaten ti pinta da.
Inpetteng na a dagitoy nasken a kitaen kangrunaan na ita a panawen ti kalgaw ken agsasaruno dagiti uram a mapaspasamak ditoy ciudad ti Laoag.
Innayon na a napinpintas koma pay no kada barangay ket adda iti bukod da nga hose tapno ti laengen aramiden ket ti mangisulbong para iti al-alisto a panangsebseb iti apoy no adda ti mapasamak nga uram.
Mainaig iti daytoy, inpakaammo met ti maysa a konsehal nga adda iti dua a maris ti fire hydrant ,daytoy ket color yellow ken red.
Basar kenkuana, no agmaris ti fire hydrant iti yellow ket makaakomodar iti nakurang a 500 a pressure ken no red ket nasursurok a 500 a pressure ti kabaelan na nga akomodaren.
