LAOAG CITY – Kalikagum ti Sangguniang Panlungsod ditoy ciudad ti Laoag a mangbuangay ti Laoag City Sports Development Council babaen iti maysa nga ordinansa.
Segun kenni Hon. Michael Christophe Agustin, gagem ti nasao nga ordinansa tapno ad-adda pay a mapapigsa ken mapaigetan ti koordinasyon iti agduduma a programa iti benneg ti sports.
Patien na a babaen iti daytoy ket maaddaan iti komprehensibo nga sports plan iti ciudad; pannakaipaay iti agtultuloy a suporta kadagiti atleta ken coach babaen iti training opportunities; ken maipaisigurado ti transparency iti pannakausar ti pundo para iti sports.
Innayon ni Agustin, a napanunutan na daytoy nga ordinansa tapno agbalin pay nga inclusive ti decision-making iti ciudad seknan iti sports.
Kunana a basar iti obserbasyon na ket adda dagiti gundaway a saan da a maimimpormaran kadagiti sports games, rason a dakkel a makatulong ti sports development council tapno adda da a mangipakaammo kadagiti aktibidad.
Kabayatanna, kiniddaw ni Konsehal Jason Perera a maaddaan iti table tennis competition inton Palarong Pamasko tapno saan laeng a volleyball ken basketball ti paglalabanan.
Kuna ni Perera a nabayag nan nga idardarirag iti pannakaraman ti table tennis, chess, ken dadduma pay nga ayayam.
Mainaig iti daytoy, dakkel ti namnama ti bise mayor a babaen iti pannakabuangay ti sports development council ditoy ciudad ket maikkan pay importansya dagiti dadduma nga ayayam, saan laeng iti basketball ken volleyball.
