LAOAG CITY – Kalikagom ti konseho ditoy ciudad ti Laoag a masuspenso ti permit ti maysa a pribado a subdibisyon ditoy ciudad gapo iti saan a napintas a supply ti danom.
Segun iti maysa a konsehal, ti pribado a subdivision ket masarakan iti Brgy. Zamboanga ditoy ciudad ken kukua ti pamilya nga adda iti politika ken maibilang kas kababaknangan iti pagilian.
Kuna na a ti mismo nga akinbagi ti subdibisyon ti akinkukua iti Prime Water ngem nasurok 10 a tawenen a problema dagiti home owners ti kinaawan ti supply ti danom.
Naamoan a rinibo nga indibidual ti agnanaed iti lugar ken kanayun da nga irekreklamo ti kaawan ti supply ti danom.
Inpakaammo pay ti konsehal a tumultulong met ti lokal a gobierno ken dagiti pribado nga indibidwal a mangsupply ti danom iti nasao a lugar ngem kasapulan a masolusyonan ti problema dagiti residente.
Mainaig iti daytoy, inpalgak ti konsehal a rumbeng a masuspenso ti permit ti nasao a subdibisyon gapo ta nalawag a nalabsing da iti nakaipalaon iti Republic Act 9514 a rumbeng nga adda ti operational nga hydrant system da a mausar a mangsebseb iti apoy no adda ti uram.
