LAOAG CITY – Kalikagom ni Sang. Panlungsod Member Derek Lao ditoy ciudad a manayonan ti garbage truck.
Segun kenni Lao, basar iti duktal na ket adda ti uppat a garbage truck ngem nu dadduma ket maperdi ti dua rason a maitantan ti panagkolektar ti basura kadagiti nagduduma a barangay ditoy ciudad.
Inbatad na a gapo iti pannakaitantan ti panagkolektar ket adda dagiti basura a maiwarang ken agtalinaed iti kalsada iti sumagmamano nga aldaw.
Kunana nga adda metten ti naiyalokar idi a pondo para iti paggatang iti nayun a garbage truck ngem iti sumaruno pay laeng a tawen a magatang dagitoy.
Gapu iti daytoy ket kalikagom na a maimbitaran dagiti maseknan a departamento tapno masolusyonan daytoy ken masurot ti schedule ti panagkolektar ti basura.
