LAOAG CITY – Nangipasa ti Australian state of Queensland ti maysa a linteg a mabalinen a maibalud dagiti ubbing nga agtawen ti sangapulo no makunbiktaran da iti aniaman a krimen kas iti murder, serious assault ken panagtakaw.
Segun iti gobierno ti nadakamat nga estado, daytoy a pagannurotan ken sentensia kadagiti agtawen ti sabgapulo ket kas sungbat iti “community outrage” gapu kadagiti krimen nga ar-aramiden dagiti agtutubo, ken kas wagas iti pananglapped ti krimen iti lugar da.
Ngem nu pay kasta, naruay dagiti nangkondenar iti daytoy, gapu ta patien dagiti eksperto a no mapatawan ti nadagsen a pannusa dagiti ubbing ket adda posibilidad a kumaro ti kriminalidad.
Binabalaw pay ti United Nations ti linteg, gapu ta mangipasimudaag laeng daytoy ti saan a panangraem ti Queensland iti conventions on the human rights of children ken panagsalungasing da iti international law.
