LAOAG CITY – Pormalton a malukatan ti operasyon ti sangay ti Dept. of Foreign Afairs (DFA) ditoy Ilocos Norte inton Mayo 8 iti dakkel a mall iti ili ti San Nicolas.
Segun ken ni Mayor Alfredo “Boying” Valdez Jr. ti nasao nga ili, adda pakaammo kenkuanan ti nasao nga opisina seknan iti nasao a banag.
Kuna na a manamnama nga agatendar iti nasao a panaglukat ni Foreign Affairs Sec. Allan Peter Cayetano ken dagiti adda iti babbabaen na.
Kuna pay ni Valdez a ti pannakairugi ti operasyon ti DFA iti ili da ket adda ti nakasaganan a 100 nga aplikante a maiproseso dagiti aplikasyon da.
Ado met dagiti naragsakan gapu ta addanton sangay ti DFA ti Ilocos Norte nga asideg a papanan da.
Maipalagip a naruay dagiti agsalsalodsod no inton kaano a mangrugi ti operasyon ti DFA iti ili a San Nicolas iti laksid nga addan ti nestablisar nga opisina da.
Maipalagip pay a ti sangay ti DFA ket masarakan idiay Tuguegarao City, Cagayan ken iti City of San Fernado idiay La Union.
