LAOAG CITY – Pinaayaban ti Sangguniang Bayan iti ili ti Sarrat dagiti dua a zanjera iti Barangay 23 iti nasao nga ili tapno agatendar ti session.
Segun ken ni Vice Mayor Remigio Medrano, daytoy ket tapno ammoen ti naan-anay a detalye gapu iti maipagarup a saan a maus-usar a solar powered pump a proyekto ti gobierno.
Inbatadna a dagitoy a zanjera ket ti zanjera manayon irrigators association ken zanjera cabaruan.
Inlawlawagna a kabayatan ti session ket ditoy a nakumpirmaranda a saan nga agop-operar dagitoy a proyekto.
Kunana a dagitoy a solar powered pump ket rumrummuar a naestablisar idi 2025 ken mapatta-patta nga umabot iti milyon a pisos ti pundona.
Gapu iti daytoy, masayangan ti Bise Mayor gapu ta arig sayang daytoy gapu ta saan met a mausar a dakkel koma a makatulong kadagiti mannalon aglalo ita a nangina ti presio ti krudo.
Naammoan a daytoy ket proyekto ti Department of Agrarian Reform nga inpatungpal ti Provincial Government of Ilocos Norte.
Maladingitan ni Medrano gapu ta immanamong dagiti kameng ti zanjera a pirmaan ti acceptance document iti nasao a proyekto uray saan nga agan-andar.
Inpettengna a minandarda dagitoy a zanjera nga agaramid ti written document nga isu ti pagibasaran ti Local Government Unit ti panagaramid ti surat a maipatulod iti Provincial Agriculture Office ken Department of Agrarian Reform.
Innayonna a maipaayanto pay ti kopya ni Gov. Cecilia Araneta Marcos ken Vice Gov. Matthew Marcos Manotoc.
