LAOAG CITY – Inaprobaran ti Sangguniang Bayan iti ili ti Solsona ti maysa a resolusion para iti preventive suspension kontra kada Barangay Chairwoman Evangeline Rarangol iti Brgy. Nagpatpatan ken Brgy. Kagawad Freznel Rubio iti Brgy. Catangraran iti nasao nga ili.
Segun ken ni Vice Mayor Jonathan De Lara iti ili ti Solsona, daytoy ket kalpasan ti maipagarup a panangibingay-bingay dagiti maseknan a Barangay Officials dagiti relief packs manipod iti Department of Social Welfare and Development – Region I a maibunong kadagiti residente a biktima ti dimmuprak a bagyo ditoy probinsia iti kallabes.
Inbatadna a nakaawat ti surat ti opisina ni Mayor Joseph De Lara manipod iti Department of Social Welfare and Development – Region I idi Disiembre 4, 2023 no sadino kalikagum ti ahensia nga ilawlawag dagiti maseknan nga opisial ti takder dagitoy maipapan iti naduktalanda iti imbestigasion a maipagarup a biningayda dagiti relief goods tapno adu ti mabunonganda a benepisiario.
Gapu iti daytoy, kunana a pinatulodan ni Mayor De Lara ti surat dagiti dua nga opisial tapno agpalawag kenkuana ngem ti insungbatda ket agpalawagda laeng no adda ti pormal a reklamo kagiddan ti ebidensia a maidasar kontra kadakuada.
Kunana a nangisayangkat ti imbestigasion ti Department of Social Welfare and Development – Region I idi Agosto 1, 2023 kadagiti maseknan a barangay ket ditoy a naammoanda ti nasao a banag.
Inlawlawagna a posible a ti maipataw a pannusa kontra kadagiti dua a Barangay Officials ket ti 50 a ribu a pisos agingga 500 a ribu a pisos, 6 a tawen agingga 12 a tawen a pannakaibalod ken perpetual disqualification.
Innayonna a naipaima iti Committee on Laws and Committee on Social Welfare ti nasao a resolusion para iti naan-anay a pannakaadal ken pannakatingiting iti daytoy.
