LAOAG CITY – Nangipasa ti Sangguniang Bayan iti ili ti Vintar ti maysa a resolusion para iti panangipaay ti pammigbig iti Philippine National Police iti nasao nga ili.
Daytoy ket kalpasan a napadayawan ti Philippine National Police iti ili ti Vintar nga idadauloan ni Police Captain Roi Manuel Ordonio.
Napadayawan ti nasao a kuerpo ti pulisia iti Ilocos Norte Police Provincial Office kalpasan a nakagun-od ti 97.42% iti Performance Evaluation Rating idi Mayo ita a tawen.
Naammoan a ti author iti naipasa a resolusion ket ni Sangguniang Bayan Member Antero Caluya.
Mainaig iti daytoy, inpannakkel ni Presiding Officer Vice Mayor Maribel Albano a babaen iti daytoy ket isu ti mangipaneknek ti naalibtak ken seryoso a panangipatungpal ti kapulisan kadagiti amin a pagalagadan iti ili ti Vintar.
Kabayatanna, personal met nga inawat ni Police Captain Ordonio ti naisangsangayan a pammigbig ti Philippine National Police iti ili ti Vintar manipud iti Ilocos Norte Police Provincial Office.
