LAOAG CITY – Pinirmaan ti Sangguniang Bayan iti ili ti Solsona ti suspension order kontra ken ni Barangay Chairman Joker Ganal iti Brgy. 1 iti nasao nga ili gapu iti maipagarup a saanna innikkan ti bonus ti pada na nga opisial iti barangay.
Segun ken ni Sangguniang Bayan Lourdines Dela Cruz a kalpasan a naipataw ti preventive suspension kontra ken ni Ganal idi Enero ket dagos a nangisayangkatda ti formal hearing mainaig iti nadakamat a kaso ket naduktalan nga adda ti substantial evidence a nagbasol ti nadakamat a barangay chairman iti Grave Misconduct willful and malicious miss-holding of bonuses iti dati a barangay kagawad rason a napatawan daytoy ti 6 bulan a pannakasuspensona.
Inpakaammona a ti naipila a kaso kontra ken ni Ganal ket mainaig iti maipagarup a saanna nga inikkan ti bonus ti dati a barangay kagawad iti nadakamat a lugar.
No sadinno idi napalabas a tawen ket adda ti naiparuk-at nga amin nga opisial ti barangay ket makaawat ti P20,000 Service Recognition Incentive ken P5,000 Productivity Enhancement Incentive.
Mainaig iti daytoy, idi nagaramid ti payroll ti barangay ket awan ti nagan ti maseknan a dati a barangay kagawad.
Nupay kasta, nagkamang ti dati a barangay kagawad iti barangay hall tapnu maalalana ti insentibo gapu ta mamati daytoy a kualipikado isuna iti nasao nga listaan ngem awan pulos ti naawatna.
Naammoan a saan nga innala ni Ganal ti nailatang a bonus para iti Brgy. Kagawad no sadinno naisubli daytoy iti biang ti banko.
Kabayatanna, inlawlawagna Sangguniang Bayan Member Dela Cruz a saan nga agpada ti preventive suspension a naipataw ken ni Ganal tapnu saanna a maimpluwesian ti imbestigasion, dagiti testigo, ken saan a maidulin dagiti ebidensia bayat a ti 6 a bulan a suspension ket maibilang a kas penalty.
