LAOAG CITY – Aprobadon iti Sangguniang Panlalawigan ti 400 a ribu a pisos a rental fee wenno panagpaupa iti Plaza del Norte Hotel and Convention Center.
Daytoy ket kalpasan a sangkamaysa nga inaprobaran dagiti agpanpanday linteg ti probinsia ti pannakaipasa ti resolusion a siniterpikaran ni Gob. Matthew Marcos Manotoc kas Urgent.
Gapu iti daytoy, segun ken ni Sangguniang Panlalawigan Member ken Chairman ti Committee on Ways and Means Atty. Franklin Dante Respicio a makipagpinnirma ti Gobierno Probinsial ti Ilocos Norte ken River Mount Hotel para iti Contract of Lease iti Plaza del Norte Hotel and Convention Center.
Inbatadna a maipalubos a maakuparan amin ti Plaza del Norte manipod iti hotel ken convention center ken napagtutulaganda kabayatan ti taripnongda iti nasao a pribado a sektor a manipod iti dati a rental fee ti Plaza del Norte Hotel and Convention Center a 385,000 pesos ket napagnunumoanda nga agbayad dagitoy ti 400,000 pesos kada bulan maibasar iti linaon ti Contract of Lease.
Inlawlawagna a kalikagum ni Provincial Treasurer Josephine Calajate a rumbeng a kitaenda a naimbag ti pannakakolektar ti rental fee ti pribado a sektor kas legal basis a pangibasaranda iti Revenue Code.
Innayonna a saanna met a masinunuo no mano ti bilang ti rooms wenno kuarto iti Plaza del Norte Hotel and Convention Center.
