LAOAG CITY – Inpasigurado ti Sangguniang Panlalawigan iti Department of Environment and Natural Resources Office – Mines and Geosciences Bureau ti pannakasaluad dagiti naideklara a protected areas ken dagiti lugar a pakasarakan dagiti watersheds.
Daytoy ket kalpasan a ti DENR – MGB ti nangidasar kadagiti programa ken proyekto a planoda a maiyimplementar ti masakbayan nangruna ti pannakaipatungpal ti Mineral Investment Promotional Program.
Ti nasao a programa ket ti panangted ti permit kadagiti aplikante para iti panagminas ditoy probinsia ken masurot dagiti masnop a proseso ken maipasa dagiti kasapulan a dokumento pakairamanan pay ti panangipasigurado a masurot ti nakaipalaonan ti Republic Act 7160 wenno Mining Act.
Segun kenni Regional Director Carlos Tayag ti MGB Region 1, awan ti rumbeng a pagamakan ti probinsia no adda dagiti maikkan ti permit ti panagminas gapu ta saan met a maipalubos a makuti dagiti naideklara a protected areas agraman dagiti watersheds.
Inpasigurado na a ti DENR-MGB ket makikaysa iti gobierno probinsial ti gagem a pannakasaluad ti aglawlaw nangruna kadagiti lugar a maibilang a protected areas wenno dagiti pagnanaedan dagiti maibilang nga endangered species.
