LAOAG CITY – Inpasa ti Sangguniang Panlalawigan ti maysa a resolusion nga agkalikagum a mangipaay ti tulong kadagiti umili a naapektaran ti El Niño phenomenon ditoy probinsia.
Daytoy ti indasar ni Sangguniang Panlalawigan Member Franklin Respicio, Chairman ti Committee on Laws.
Segun kenkuana, iti kallabes ket adda ti nagbalin a dakkel nga epekto ti nalabes a kinabara ti paniempo ditoy probinsia a nangapektar kadagiti umili nangnangruna kadagiti mannalon ken mangngalap pakairamanan iti benneg ti salun-at.
Gapu iti daytoy, inbatadna a rumbeng a mangipaay dagiti Local Government Units ti tulong para kadagiti maseknan a naapektaran tapno matulongan dagitoy a makarekobre. Kabayatanna, kuna ni Respicio a babaen iti resolusion ket maipaayan ti bileg ni Gov. Matthew Marcos Manotoc tapnon makipinnirma ken maala ti donasion manipud iti Office of the President a 50 milyon a pisos a dakkel a makatulong kadagiti nasao a naapektaran gubuay iti El Niño phenomenon.
