LAOAG CITY – Manamnama ti panangiyetnag ti desision ti Sangguniang Panlungsod no kasapulan a mangiwayat ti imbestigasion maipanggep iti reklamo kontra ken ni Barangay Kagawad Jake Andres ti Brgy. Caaoacan ditoy siudad ti Laoag.
Segun ken ni Sangguniang Panlungsod Member Jason Perera, nasken a kitaen a naimbag ti konseho no adda ti probable cause ti reklamo kontra iti nasao nga opisial ti barangay inton sumaruno a pannakaiyuswat ti regular session.
Inbatadna nga agpaot ti sangapulo nga aldaw ti pannakaiwayat ti naan-anay nga imbestigasion maipapan iti nasao a reklamo.
Kunana a naawaten ti Sangguniang Panlungsod ti nagbalin a sungbat ti mairekreklamo pakaseknan iti sangsangoenna a kaso administratibo.
Kabayatanna, kiniddaw ni Konsehal Perera nga adalen ken tingitingen a naimbag dagiti padana nga agpanpanday linteg maipanggep iti daytoy pakairamanan ti reklamo ni Barangay Chairman Adel Boy Quinto.
