LAOAG CITY – Inaprobaran ti Sangguniang Panlungsod ditoy siudad ti Laoag ti maysa a resolusion maipapan iti Code of General Ordinances.
Basar iti sponsorship speech ni Konsehal Roger John Fariñas, umad-adu dagiti maputputar nga ordinansa ditoy siudad ngem marigatanda ken dagiti law enforcers a mangbigbig no ania ti agdama ken saanen a maipatpatungpal.
Babaen iti daytoy, maadal ken matingiting a naimbag dagiti agpanpanday linteg dagiti ordinansa a maiyim-implimentar ditoy siudad ti Laoag.
Inbatad ni Fariñas a nasayaat daytoy nga addang ti konseho tapno maimpormaran dagiti maseknan nga umili maipanggep dagiti manarimaan a maipatpatungpal a linteg ditoy siudad ti Laoag.
Maipalagip a kalikagum ni Konsehal Jaybee Baquiran nga adda koma maputar nga ordinansa maipanggep kadagiti dumaldalan iti depresyon.
Nupay kasta, nalagip ni ABC President Rbee Ablan nga adda manen ti kastoy nga ordinansa a pinutarda iti kallabes.
Gapu iti daytoy, immannugot dagiti amin nga agpanpanday linteg a masapolen ti panangisayangkatda ti codification tapno maduktalanda dagiti ordinansa nga epektibo pay laeng a maipatpatungpal.
