LAOAG CITY – Nagballaag ni Sangguniang Panlungsod Member Jaybee Baquiran iti publiko nga agannad maipanggep iti Farm to Market Investment.
Daytoy ti indasarna kabayatan ti naiyuswat a regular session ti Sangguniang Panlungsod ditoy siudad ti Laoag.
Segun kenkuana, no ag-invest ti maseknan nga indibidual ti maysa a baboy nga agbalor ti lima a ribu a pisos ket maipagarup nga agbalin a walo a ribu a pisos kalpasan ti tallo a bulan.
Inbatadna nga iti umuna ken maikadua nga investment ket mayat pay laeng ngem idi maikatlo a gundaway ket awanen no sadinno adda pay ti nag-invest ti dua a milyon a pisos manipud idiay Hawaii, USA a gagemna nga agpaaramid ti pagtaenganda.
Nupay kasta, saan metten nga agpakita ken mabirukan ti adda iti likudan ti Farm to Market Investment.
Kunana a nakikoordinaren dagiti maseknan nga indibidual iti National Bureau of Investigation maipapan iti nasao a banag.
Kabayatanna, inpakaammo ni Konsehal Jason Perera a saan a dagus a mamati kadagiti agididiaya ti investment ken agbalin a naridam tapno saan a mabiktima iti panangallilaw dagiti managgundaway a tattao.
