LAOAG CITY – Kalikagum ti Sangguniang Panlungsod a maala amin ti birthing bed kadagiti Barangay Health Unit ditoy siudad ti Laoag,
Daytoy ket kalpasan a naammoan ti Presiding Officer kabayatan iti panagturongna iti Barangay 27 ditoy siudad a saan a maus-usar dagitoy.
Inlawlawagna ti kangrunaan a rason a saanen a mausar dagitoy a birthing bed gapu ta naiget a maipawil ti agpaanak iti maysa a Barangay Health Center.
Mainaig iti daytoy, kunana a maipadanon daytoy a banag ken ni Dr. Rodrigo Catcatan, mangidadaulo ti City Health Office ditoy siudad ti Laoag tapno maala amin dagitoy ken maikabil iti balay pagagasan tapno mausar.
Innayonna a no mabaybay-an dagitoy ket mabalin a mapukaw wenno maperdi isu’t gapuna a nasaysayat no maikabil dagitoy kadagiti ospital a nayon a kagamitan dagiti agkasapulan dagitoy a banag.
Kabayatanna, ti birthing bed ket naisangsangayan a nadisenio a mangsuporta kadagiti inna bayat ti panagpasngayda.
