LAOAG CITY – Kiniddaw ti Sangguniang Panlungsod nga isubli ni Mayor James Bryan Alcid ti 5 nga aldaw a panagtrabaho dagiti empleado ditoy siudad ti Laoag.
Daytoy ket babaen ti indasar ni Vice Mayor Rey Carlos Fariñas a maysa a resolusion.
Segun iti Bise Mayor, sipud idi naiyimplimentar ti 4-day work week ket adu dagiti nakawa nga empleado ken residente ditoy siudad ti Laoag
Inbatadna a basar iti obserbasionna ket arig agbalbalin a ghost town ti City Hall manipud alas singko ti malem agingga iti 6:30 ti rabii gapu ta awanen ti tao nga agturong iti City Hall.
Inlawlawagna nga apaman a nagturong iti Barangay 16 ditoy siudad ti Laoag para iti maysa a general assembly ket ditoy a naduktalanna a saan a pabor dagiti residente ti 4-day work week.
Kunana a no tingitingen ti pammilin ni Presidente Ferdinand Marcos Jr. ket saan met a kapilitan a sumurot amin nga ahensia ti gobierno nangruna kadagiti Local Government Units.
Inpettengna a no kitaen ti gagem ti Presidente ket kalikagumna nga aginot ti gobierno ti kuriente ken daytoy ket mabalin a maaramid uray agtalinaed a lima nga aldaw ti panagtrabaho.
Innayonna a ditoy probinsia ket adda ti 12 nga ili ken 2 a siudad ti nagadaptar iti daytoy.
Kabayatanna, naammoan a nagsublin ti 5-day work week ti City Government of Batac sipud idi Lunes, Marso 16.
