LAOAG CITY – Inaprobaran ti Sangguniang Panlungsod ti maysa a resolusion a mangiwayat ti sabali manen a 90-Day Experimental Traffic Scheme kadagiti sumagmamano a kalsada ditoy siudad ti Laoag.
Segun iti Vice Chairman ti Committee on Transportation, daytoy a resolusion ket namunganay kabayatan ti naisayangkat a public hearing dagiti tricycle ditoy siudad.
Inbatadna a maikidkiddaw ti panakabalbaliw ti direksion a maipalubos a pagturongan dagiti behikulo a dumalyasat.
Inlawlawagna a babaen iti daytoy, makita no epektibo daytoy sakbay a mangaramid ti Sangguniang Panlungsod ti ordinansa tapno mapagbalin a permanente ti nasao a lungalong.
Kunana a basar iti nailanad iti nasao a resolusion, ti Paco Roman Street manipud iti J.P. Rizal Street agingga iti Gen. Antonio Luna Street ket mapagbalin a two way traffic route.
Kabayatanna, ti Paco Roman Street manipud iti Domingo Samonte Street agingga iti Gen. Antonio Luna Street ket mapagbalin nga one way south bound ken iti Lagasca Street manipud iti General Luna Street agingga iti P. Lazaro Street ket mapagbalin nga one way northbound.
