LAOAG CITY – Naiget a naglikudan ni Sangguniang Panlungsod Member, Dr Jed Nalupta ti alegasyun kontra kenkuana a maipagarup a tinulpak na ti maysa a traffic aide a mangiwanwanwan ti traffic light iti paset ti brgy Tabug ti ciudad ti Batac itay kallabes a Pebrero 14.
Segun kenni Nalupta, bayat ti panagturong na iti puwesto ti traffic aide a mangiwanwanwan iti traffic light ket tinimpag na laeng ti lamisaan no sadino nga iti dayta a gundaway ket nakadumog ti maseknan.
Kuna a maipagarup a saan a kitkitaen a naimbag ti traffic aide nga agtawen ti 18 ti ar-aramiden na.
Inlawlawag ti konsehal nga immuna ket nabayag nga naka-red light nupay awan metten ti makasinnabat da a lugan ngem inyuray da latta a nag-green light.
Nupay kasta, kalpasan a nagsilaw ti berde a silaw iti batog da ket pinagsilaw met ti traffic aide ti berde a silaw iti bangir a lane ti kalsada gapuna nga nagsisinnabaten dagiti lugan.
Segun kenni Nalupta, maluksaw gapu ta arigna napagbalin nga iresponsable wenno kriminal a tao ti pannakailadawan na.
Kuna na a no pudno koma a tinungpa-tungpa wenno kinabkabil na ti traffic aide ket napan koma nagpa-medical.
Inbatad ni Nalupta a ti napasamak ket naimatangan ti barangay kagawad nga agnagan Cristopher ti Brgy Magnuang ti nasao a ciudad.
