LAOAG CITY – Nangipasa ti Sangguniang Panlungsod ti maysa a resolusion para iti pannakaiyalud-od ti panag-renew ti business permit ken lisensia ditoy siudad ti Laoag.
Daytoy ket naidasar babaen ken ni Konsehal Conrado Respicio ti Chairman ti Committee on Ways and Means.
Segun kenkuna, nasertipikaran ti nasao a resolusion kas certified urgent tapno insigida daytoy a maaprobaran iti konseho.
Inbatadna a babaen iti daytoy ket awan ti maipataw nga aniaman a multa manipud inton Enero 31 agingga iti Pebrero 28.
Inlawlawagna a daytoy ket tapno maipaayan ti gundaway dagiti dadduma pay nga umili nga agpa-renew kadagiti business permit ken lisensia dagitoy.
Kunana a kinasapulan nga iyalud-od daytoy gapu ta nakita ti konseho nga adda ti 6,131 a negosio ditoy siudad kas maibasar iti datos manipud idi Disiembre 31, 2025.
Kabayatanna, basar iti City Treasurer’s Office nga adda laeng ti 30.24% ti nakapag-renew kadagiti business permit ken lisensiada.
