LAOAG CITY – Inpakaammo ni Police Senior Master Sergeant Eric Bumagat, ti mangidadaulo iti Philippine National Police – Traffic Division ditoy siudad ti Laoag a nangrugi a napaserraan ti kalsada iti sangoanan ti Kapitolio Probinsial ti Ilocos Norte iti oras ti alas dos ti malem.
Daytoy ket kas panagsagsagana ti Kinni-kinni parade kas paset iti pannakaselebrar ti International Women’s Day mangrugi ita nga aldaw.
Segun ken ni Police Senior Master Sergeant Bumagat, apaman iti natapogan iti oras ti alas dos ita a malem ket ditoy a rinugianda ti panangiestablisar kadagiti traffic signages kadagiti kangrunaan a kalsada nangruna iti sentro ditoy siudad.
Inbatadna a ti nagrugian ti parada ket manipod iti paset ti J.P. Rizal Street corner Ed Guerrero Street wenno asideg iti Brgy. 19 ditoy siudad ti Laoag.
Kunana nga amin a motorista nga aggapu iti ili ti San Nicolas wenno iti Brgy. Nangalisan-A nga agturong iti Gilbert Bridge ditoy siudad ti Laoag ket nasken nga agpakannawan dagitoy iti Bonifacio Street idinto a dagiti dumaldalyasat nga agpa-abagatan ket agturongda laeng iti Ablan Avenue wenno Bonifacio Street.
Inlawlawagna a naiget daytoy a masurot nangruna ket manamnama a naruay dagiti makipaset iti nasao a programa.
Kabayatanna, mangnamnama ni Bumagat ti naan-anay a pannakikooperar dagiti amin a motorista tapno maliklikan ken maalay-ayan ti panagirot ti taray iti trapiko.
