LAOAG CITY – Naiget a maipawil iti panagusar kadagiti sanikua ti gobierno kangrunaan na dagiti behikulo iti panagkampanya para iti mapaspasangasangan a Barangay ken Sang Kabataang Elections a maiyuswat intono Oktubre 30 ita a tawen.
Daytoy ti inbatad ni Atty. Julius Balbas, ti Commission on Election Officer ditoy ciudad ti Laoag.
Kuna ni Balbas a no adda dagiti sanikua ti gobierno nga usaren dagiti kandidato ket agbalin daytoy a liability ti lokal a gobierno.
Nagballaag met ni Balbas kadagiti kandidato a mangusar iti sanikua ti gobierno iti panagkampanya da a mabalin a sumango dagitoy ti disqualification case.
Gapu iti daytoy, binalakadan ni Balbas ti publiko a no adda dagiti makita da a kandidato a mangusar iti sanikua ti gobierno a pakairamanan ti barangay kangrunaan na ti behikulo ket saan da nga agpangadua a mapan agreport iti opisina da.
Immuna iti daytoy, naireklamo ni Barangay chairman Dondi Bayudan iti Barangay Sto. Niño iti ili ti Nueva Era a maipagarop nga us-usaren na ti lugan ti barangay iti panagkampanya na, banag a naglikudan ti nadakamat a kapitan.
