LAOAG CITY – Bwineltaan ti Malacañang ti rakurak ni Vice President Sara Duterte nga awan pay ti planona nga agawen ti puesto ni Presidente Ferdinand Marcos Jr. ken saanna a supsuportaran ti aniaman nga extra-constitutional nga addang kontra iti administrasion.
Inbatad ni Palace Press Officer Undersecretary Claire Castro a saan a mabalin a pagkedkedan ti Bise Presidente nga idi pay laeng ket inpeksana daytoyen ti panagkalikagum a mapadisi iti puesto ni Presidente Marcos.
Dinakamat ni Castro ti panagbitla ni Duterte iti The Netherlands idi Hulio 19, 2025 no sadinno a kunana a kalikagumna a mapatalaw iti puesto ti Presidente.
Inpettengna a no pudno a kontra ti Bise Presidente kadagiti destabilization efforts ket nasken daytoy a lappedan dagiti kaalyadona a maipagarup a mangilunglungalong iti daytoy.
Sinungbatan pay ni Castro a ti panangawag ni Vice President Sara ken ni Presidente Marcos nga awan ti babainna ket ad-adda a maibagay kadagiti Duterte.
Innayonna a ti nasao a panangiladawan ket saan a maiyannatop iti Presidente no diket kadagiti tattao a karaman iti kinaranggas, panangbutbuteng ken panagiwaras ti fake news.
