LAOAG CITY – Ibilang ni Sangguniang Panlalawigan Member Atty. Da Vinci Crisostomo, Chairman ti Committee on Laws a kinastupido ti alegasyon ni Dumalneg Vice Mayor Francis Espiritu kontra kadakuada a kameng ti SP.
Daytoy ket mainaig pay laeng iti maipagarup a panangdawat ti kwarta dagiti kameng ti SP kenni VM Espiritu tapno saan daytoy a maipadalan iti preventive suspension.
Nupay kasta, inpetteng ni Crisostomo nga awan ti kinapudnona iti alegasyon nga ibatbato ni Espiritu kontra kadakuada.
Inpasingkedna nga adda ti kalintegan ni Espiritu a mangipresentar ti kabibiang daytoy tapno maobserbar ti husto a proseso.
Kabayatanna, inpasingked met ni Sangguniang Panlalawigan Member Donald Nicolas a makaumanayen ti sungbat ti isaksaklang ni Espiritu a ni Sangguniang Panlalawigan Member Domingo Ambrocio.
Innayonna a pending pay laeng daytoy a kaso rason a saan pay laeng a nasken a pagsaritaan daytoy.
Kabayatanna, kinontra ni Vice Mayor Francis Espiritu iti ili ti Dumalneg ti rakurak ni Sangguniang Panlalawigan Member Da Vinci Crisostomo nga estupido daytoy seknan iti inbato na nga alegasyon kontra kadagiti kameng ti junta probinsyal.
Daytoy ket mainaig iti maipagarup a panagdawat ti kwarta dagiti kameng ti SP kenni Espiritu tapno saan a maipadalan iti preventive suspension.
Kuna na a nakasagana a dumalan iti lie detector test tapno mapaneknekan na dagiti alegasyon kontra iti SP.
Inlawlawag ni Espiritu a nagsarita da kenni Crisostomo iti kallabes mainaig ti alegasyon ngem naibalakad kenkuana na a kasarita na ni Bokal Domingo Ambrocio tapno isunto ti agreport kenni Crisostomo.
Mainaig iti daytoy, kuna na a nangipatulod ti video conversation kadagiti miembro ti junta probinsyal ngem maipagarup a nagulimek wenno saan a binuya dagitoy.
Inpatulod na ti video conversation kadagiti opisyal ti SP tapno mapaneknekan a saan a pudno ti alegasyon a binutbuteng ni Espiritu ti agnagan ti Mario Gamiao babaen kadagiti armado a tattao.
Inbatad na nga iti biang ti bileg na kas bise mayor nga ab-abusuen na ti posisyon ket awan ti pammaneknek.
Nupay kasta, kuna na nga awan ti nagibasaran dagiti opisyal iti pannakaipataw ti preventive suspension kenkuana ngem ketdi ti laeng sarita ti abogado ti maipagarup a nangibasaran da.
Gapu iti daytoy, plano ni Espiritu nga ipaima iti National Telecommunications Commission ti cellphone daytoy kasta met a kinarit na nga ipaima ni Crisostomo ti cellphone daytoy tapno mapaneknekan dagiti alegasyon ti bise mayor.
Pinaboran na met ti sarita ni Sangguniang Panlalawigan Member Donald Nicolas a saan kuma pay laeng a pagsaritaan ti nasao a kaso.
Innayon ni Espiritu a masapul kuma nga agbalin a patas ti panangtaming dagiti opisyal iti junta probinsyal ti kaso na.
