LAOAG CITY – Inlawlawag ni Mrs. Leilna Ramos, Grade 6 Adviser ti Sarrat South Central Elementary School mainaig kadagiti reklamo iti panagturpos dagiti Kindergarten ken Grade 6 pupils.
Segun kenkuana, sipod pay a nangrugi a nangisuro isuna iti nasao a pagadalan ket saanna pay a napuutan a naggiddan a maisayangkat ti graduation ceremony ti Kindergarten ken Grade 6 banag a naiget a kontraen dagiti sumagmamano a nagannak.
Inbatadna a saan a mabalin nga agiddan ti graduation ceremony ti Kindergarten ken Grade 6 gapu ta adu ti bilang dagiti agturpos.
Inlawlawagna nga adda ti 23 a Kindergarten pupils ken 51 a Grade 6 pupils ti agturpos nga School Year 2024-2025.
Malaksid iti daytoy, kunana a no maipapan iti bayadan dagiti nagannak, 1,100 a pisos ti pakabuklan a bayadan ti maysa a Kindergarten pupil idinto a 1,112 a pisos met ti maysa a Grade 6 pupil no sadinno iti nasao a gatad ket ti 500 a pisos ditoy ket para iti graduation souvenir dagiti graduates a naka-frame.
Inpakaammo ni Mrs. Ramos a no adda ti anak ti maysa a a nagannak nga agpada nga agturpos iti Kindergarten ken Grade 6 ket agpada met dagitoy nga agbayad.
Inpettengna nga adda ti naiyuswat a taripnong dagiti nagannak sakbay a naipatungpal ti napagnunumoanda nga awan met dagiti nangiyebkas ti panangkontrada iti daytoy.
Innayonna a mamati isuna a dagiti nagreklamo a nagannak ket dagiti saan a nagatendar iti naiyuswat a taripnong.
Immuna iti daytoy, adda ti naawat a reklamo ti Bombo Radyo Laoag News Team manipud kadagiti sumagmamano a nagannak ti Sarrat South Central Elementary School maipanggep iti panangkontrada iti panagsingir ti pagadalan para iti graduation ceremony dagiti annakda.
