LAOAG CITY – Inpasigurado ti Kingdom of Saudi Arabia a manarimaanen ti panangiproseso da ti bayad para kadagiti benepisyo dagiti Filipino workers a saan a nabayadan dagiti sweldo da kalpasan a naideklarar a nalugin dagiti kompanya a nagtrabahoan da.
Segun iti gobierno ti Saudi, addan ti inlatang da nga initial funding para kadagiti benepisyo dagiti mangmangged a Pilipino.
Inbatad ni Saudi Crown Prince ken Prime Minister Mohammed Bin Salman ken ni Presidente Ferdinand Marcos Jr. nga iprosproseso dan ti bayad ken tututukanen ti ari dagiti detalye daytoy.
Inparipirip pay ni Prince Mohammed a kalikagom na ti umay bumisita iti Pilipinas ken ditoy a pormal nga imbitaran ti chief executive ti Crown Prince.
Immuna a nagkita dagiti dua a lider idiay Bangkok, Thailand, iti sidelines ti Asia Pacific Economic Cooperation (APEC) Economic Leaders’ Meeting idi Nobyembre 2022.
