LAOAG CITY – Nabigbig ti P-POP Kings SB19 kas Favorite Asian Act iti Nickelodeon Kids’ Choice Awards 2024.
Ti grupo nga SB19 ket buklen da Pablo, Stell, Josh, Justin, ken Felip.
Inpeksa ti grupo ti panagyamanda kadagiti fans ken Nickelodeon babaen iti online accountda ken inpaganetgetda ti dayaw a mangibagi iti pagilian.
Inabak ti SB19 ti K-pop a grup nga ENHYPEN, Malaysian singer a ni Iman Troye, Japanese girl group a NiziU, ken Indonesian singer a ni Tiara Andini.
Nagyaman ti tunggal maysa iti grupo ket kinunada a ti panagballigi ket napateg a gapuanan dagiti kumakanta a Pilipino, kalpasan ti panagballigi ni Jake Zyrus idi 2012.
Nabiit pay nga inruar ti SB19 ti comeback track-da a “Moonlight,” ken addaan to encore telecast ti Kids’ Choice Awards inta Hulio 18 ken Hulio 20.
