LAOAG CITY – Inrakurak ti P-pop group nga SB-19 a magagaran dagitoyen iti isayangkatda a ”Simula at Wakas World Tour” no sadinno nga aglikosda iti 18 a siudad iti Asia, Middle East ken North America.
Mangrugi iti nasao a tour ti grupo idiay Bulacan a naikeddeng inton Mayo 31, 2025 kalpasan ket sarunoenda daytoy iti Taipei idiay Taiwan inton Hunio idinto nga inton Hulio ket agturong ti SB19 idiay North America kangrunaanna iti California ken Canada.
Karaman pay kadagiti lugar a pangiyuswatan ti concert ti SB19 ket ti Hawaii, Singapore, Dubai, Doha, Riyadh ken iti Jeddah pakairamanan ti Sydney, Melbourne, Tokyo ken Hong Kong.
Ti nasao a world tour ket kageddan ti naimballigianda a world tour iti napalabas a tawen a “Pagtatag World Tour.”
Magagaran dagiti fans-da iti naikeddeng a pannakairuar ti album-da inton Abril a kapada ti nagan ti world tour-da ita.
Maipalagip a nangiparuk-at ti P-pop group ti first album-da a ‘Get in the zone’ idi 2020 a sinaruno ti ‘PAGSIBOL’ idi 2021 karaman ti sikat a ‘PAGTATAG’ nga inruarda idi 2023.
