LAOAG CITY – Inlawlawag ni Sanggunian Bayan Member ken Chairman iti Committee on Appropriations Amador Sadumiano iti ili ti Paoay ti saan pay a pannakaipasa ti 2022 annual budget iti nasao nga ili.
Segun ken ni Sadumiano, trinatar ti municipal development council iti Paoay ti pannakaaprobar ti 20% development fund manipod iti 137 million a naiyalokar a bugdet iti nasao nga ili ita a tawen.
Nu pay kasta, inbatad na a saan a naaprubaran gapu ta kurang ti budget iti pannakagatang ti saggaysa nga e-bike iti tunggal barangay tapno mausar iti panagkolektar ti basura.
Kabayatanna, kuna ni Sadumiano nga iti pannakatratar ti nasao a pondo idi biernes ket naisapulan ti nayun a pondo ti pannakagatang ti e-bike.
Inbatad na a manipod iti 1.5 milyon a pisos a naiyalokar itay napan a tawen ket nanayunan ti dua a milyon manipod iti pondo a naiyalokar iti tunggal opisyal ti local a gobierno iti Paoay.
Immuna iti daytoy, inlawlawag ni Sadumiano a ti pannakagatang ti e-bike ket karaman iti 20% development fund iti Paoay.
Kuna ti opisyal a matratar manen ti nasao a pondo intuno biernes babaen kadagiti mangbukbukel iti executive department ken kalpasanna ket ti Sanggunian Bayan ti sumaruno a mangtratar.
Kabayatanna, inlawlawag ni Sadumiano a nu maipanggep iti nayun a sweldo dagiti empleado ti local a gobierno ita a tawen ket maipaay daytoy apaman a maipasa ti budget.
