LAOAG CITY – Kalikagum ni Sangguniang Bayan Member Cesar Agustin a makagatang ti lokal a gobierno iti ili ti San Nicolas ti pagkiloan iti merkado publiko.
Gapu iti daytoy, sinaludsodna iti Meat Inspector aglalo ket addan ti sumagmamano a bulan a naperdin daytoy.
Mainaig iti daytoy, inlawlawag ni Mr. Harvey Calamayan ti Meat Inspector ken mangimatmaton ti Slaughter House a saanen a mabalin a matarimaan ti dati a pagkiloan gapu ta kasapulanen a gumatang ti baro.
Kunana nga addan ti nakitada a mabalin nga isu metten ti gatangenda iti kabiitan a panawen tapno insigida daytoy a mausar iti tiendaan.
Kabayatanna, kiniddaw ni Agustin a masapul a masolbar dagiti problema iti merkado publiko kangrunaanna ti pannakaiserrek dagiti karne ti baboy nga iligal.
Mamati a ti rason daytoy ket gapu ta nakalukat ti ridaw iti amianan isut gapuna a nasken a maiserra daytoy gapu ta ti laeng sango ti mabalin a pangiserrekan ken usar ti meat van.
