LAOAG CITY – Kiniddaw ni Sangguniang Panlungsod Member Derrick Lao a maaddaan ti Civil Security Unit wenno CSU dagiti sumagmamano a pagadalan ditoy siudad ti Laoag.
Kinunana a basar iti obserbasionna ti kinaawan iti CSU iti maysa a pagadalan ket mangitunda iti panagirut ti trapiko.
Segun kenkuana, dagiti CSU ti mangtulong a mangpallukay iti taray a trapiko ditoy siudad nangruna iti panagserrek ken panagruar dagiti estudiante.
Gapu iti daytoy, idawdawat ni Lao a no mabalin ket makikoordinar ti mangidadaulo iti Civil Security Unit maipanggep iti nasao a banag.
Kabayatanna, inbatad ni Vice Mayor Carlos Fariñas a maierdonsar pay laeng daytoy banag iti mangidadaulo iti nadakamat a pagopisinaan ken maadaal a nasayaat.
