LAOAG CITY – Dakkel ti pammati ni Sangguniang Bayan Member Jenny Ibali, Chairman ti Committee on Appropriations ti Sangguniang Bayan iti ili ti Pasuquin nga adda ti maris pulitikana ti pannakatratar ti Annual Budget iti lokal a gobierno iti nasao nga ili.
Segun kenkuana, daytoy ket kalpasan a saanen a masursurot ti Internal Rules and Procedures ti pannakatingiting ti pundo iti ili ti Pasuquin.
Inbatadna a nakissayan ti Development Fund ti lokal a gobierno ti 18 a milyon a pisos manipud iti orihinal a pundo a 233 a milyon a pisos isu a nagbalin laengen a 215 a milyon a pisos ti nabati.
Inlawlawagna nga iti tunggal lokal a gobierno ket rumbeng a maaddaan ti 20% Development Fund nga aggapu iti National Government a National Tax Allowance no sadinno a ti 20% ket mailatang para kadagiti developmental project.
Nupay kasta, masdaaw ni Konsehala Ibali no apay 11% laeng ti inaprobaran ti Sangguniang Bayan a Development Fund banag a maikanniwas daytoy iti paglintegan.
Kabayatanna, dimmawat ti naan-anay a pannakaawat ni Sangguniang Bayan Member Armando Aguinaldo kadagiti umili gapu iti pannakaitantan ti pannakaaprobar ti pundo ti ili.
Maipalagip nga inlawlawag met ti Local Chief Executive iti ili ti Pasuquin nga in-veto-na laeng ti nasao a pundo ken apaman nga insublina iti Sangguniang Bayan ket nakailanad ditoy ti veto message-na.
Immuna iti daytoy, kaadduan kadagiti kameng ti Sangguniang Bayan ket maipagarup a kalikagumda a maaprobaran ti pundo ngem rumrummuar a ti Bise Mayor, ABC President ken maysa a Konsehal ti saan nga umanamong iti daytoy.
