LAOAG CITY – Nagkamang iti PNP-Currimao ni Sangguniang Bayan Member Charles Lazo tapno agblotter ken agipila ti reklamo kontra ken ni Sangguniang Bayan Member Isabelo “Belong” Aglipay gapu iti maipagarup a panangdanog na iti konsehal.
Daytoy ti inpakaammo ni PCapt. Chris Anthony Sorsano, ti chief of police iti nasao nga ili.
Kuna ni Sorsano a basar iti palawag ni Lazo, agturong daytoy iti barangay hall iti Brgy. Gaang tapno agkampanya idi ta nasabat na ti lugan ni Aglipay ken dita a maipagarop nga adda ti inbalikas na a madi.
Gapu iti daytoy, nagbaba ni Lazo iti lugan na ken sinalusod na ken ni Aglipay nu siasino ti pangibagbagan na ti inbalikas na.
Kuna na a dita a nangrugi ti komosyon iti nagbaetan dagiti dua nga opisyal ken maipagarup a dinanog ni Aglipay ni Lazo iti naminsan a daras.
Mainaig iti daytoy, inbatad ni Sorsano a basar ken ni Lazo ket saan a simmubot idi nadanog ni Aglipay ken dagus a nagreport iti kapulisan.
Naamoan a ni Lazo ket agpaidasig manen kas SB Member iti nasoa nga ili idinto a ni Aglipay ket ti asawa na ti agpaidasig kas konsehal gapu ta agturposen ti termino na.
Kabayatanna, saan metten a dinakamat ni Sorsano ti dadduma a detalye seknan ti maipagarup a personal a riri iti nagbaetan dagiti dua nga opisyal.
