LAOAG CITY – Naladingit ni Sangguniang Bayan Member Marife Nacion, chairman ti committee on laws iti konseho iti ili ti Sarrat seknan ti pannakadiscriminate dagiti umili gapu iti kelaat a panagadu ti kaso ti COVID-19 iti nasao nga ili.
Kuna na nga adda ti municipal ordinace seknan ti anti-discrimination ti lokal a gobyerno iti ili ti Sarrat ken adda ti 2,500 a pisos a multa dagiti agsalungasing.
Nupay kasta, agapekto laeng ti ordinansa iti uneg ti ili.
Mainaig iti daytoy, basar kadagiti report ket adda dagiti umili ti Sarrat a nakapasar iti diskriminasyon iti sabali nga ili.
Inbatad ni Nacion a ti sumaruno a regular session ti konseho ket kiddawen da kenni Gov. Matthew Marcos Manotoc ti naig-iget a pannakaipatungpal ti Anti-Discrimination law ti probinsya.
Inlawlawag na a dagiti makapasar ti diskriminasyon a taga Sarrat ken napasamak iti sabali a lugar ket inpakaammo da laeng iti lokal a gobyerno ti Sarrat babaen ti panagsurat da ti pormal a surat ken isuda ti mangidanun iti gobyerno probinsyal.
Inpakaammo ni Nacion a mabalin pay ti agreklamo iti COVID Task Force, opisina ti Mayor, opisina ti Sangguniang Bayan babaen iti committee on laws ken iti Sarrat Municipal Police Station.
Kinumpirmaran na nga adda ti naireport kenkuana nadiscriminate nga umili iti Sarrat a mapan kuma aglako iti sabali nga ili ket saan a napastrek nupay adayo da iti nailockdown a lugar iti nasao nga ili.
Adda pay dagiti RHU iti sabali nga ili a mapagsasaritaan dagiti taga Sarrat ken adda dagiti umili a saan a napastrek iti maysa a grocery iti sabali nga ili, ken adda ti maysa nga empleyado ti LGU ken ti ina na a napan da nagpakonsultar iti doktor ket iti ruwar ti pasilidad ti nangtamingan da ti nasao nga ina.
Gapu kadagiti report a naawat na ket ad-adda a nangpadagsen iti rikna dagiti umili.
Kiniddaw ni Nacion ti panagsurot dagiti umili kadagiti pagalagadan tapno saanen a kumaro ti panagwaras ti COVID-19.
