LAOAG CITY – Nakapungtot ni Sang Bayan member ken Acting Mayor Ruben Marcos iti ili ti Dingras kalpasan a naidanun kenkuana a ti inpaay na a tulong pinansyal iti napan nagpatulong iti opisina na ket saan amin a naitungpal.
Inlawlawag na a no adda ti mapan agpatulong ket ikkan na ti 5 ribo a pisos wenno 3 ribo a pisos.
Nupay kasta, adda ti report kenkuana nga imbes a 3 ribo a pisos ti naited iti maysa kadagiti tinulungan na ket 2 ribo a pisos laeng iti baet nga insurat na ti gatad a maited.
Inpetteng na a basar iti maysa kadagiti tinulungan na ket 2 ribo a pisos laeng ti inted ti agnagan ti “ Jen Lague” manipod iti opisina ti mayor iti ili ti Dingras.
Gapu iti daytoy, napan na kinomprontar ti maseknan ken sinaludsud na no adda ti otorisasyon na a mangsukat ken mangsukat ti pirma na kas acting mayor, ngem maipagarop nga awan ti naisungbat ti maseknan.
Inpalgak ni Marcos nga imbitaran danto ti maseknan nga empleado iti konseho tapno pagsasaritaan da daytoy a banag.
Inpaganetget ti acting mayor nga iti napasamak ket amangan no atapen dagiti tultulungan na nga isuna ti mangibulbulsa ti maikissay a kwarta, banag a saanna pulos a maaramid.
Kabayatanna, inlawlawag ni Mayor Jeofrey Saguid iti ili ti Dingras a napagnunumoan da a ti kantidad nga ipaay da a tulong kadagiti umili ket ibasar da no kasanu ti kagrabe ti sinagaba wenno kondisyon dagiti maseknan.
Innayon na a babaen iti daytoy ket patas ti panangipaay da ti pinansyal a tulong kadagiti residente iti ili ti Dingras gapu ta adda dagiti gundaway a dakdakkel pay ti maited da iti saan unay a napakarwan no saanda a makita a naimbag no ikompara kadagiti dakdakkel ti pagkasapulan na ti pinansyal a tulong.
Kuna ti Mayor a kamali dagiti staff na ket saan da a nailawlawag daytoy a banag ken ni Konsehal Marcos no sadinno nga ibilang na ti napasamak kas “miscommunication”.
