LAOAG CITY – Inbatad ti Cybercrime Investigation and Coordinating Center (CICC) nga adda ti pakabuklan a 10,004 cybercrime complaints ti naipila iti opisina da idi 2024, mamintallo a daras nga ad-ado no ikompara iti 3,317 a reklamo idi 2023.
Inrakurak ni Cybercrime Investigation and Coordinating Center Executive Director Undersecretary Alexander Ramos a ti pakabuklan ti kantidad a naala manipod iti cybercrime victims ket umabot iti agarop P198 a milyon iti laeng napalabas a tawen.
Iti pakabuklan, adda ti 3,534 a reklamo wenno 35 a porsyento ti consumer fraud, karaman ti non-delivery kadagiti produkto wenno serbisyo ken peke nga advertisements.
Kabayatanna, kuna ni Ramos nga adda met ti 3,242 nga online fraud complaints, karaman ditoy ti financial fraud, impersonation, job scams, investment scams, ken love scams.
Karaman met iti dadduma a klase ti reklamo ti unsolicited communication, illegal access, identity theft, sexual cybercrimes, phishing, ken cyberlibel.
Nagpanawagan ni Ramos kadagiti biktima ti scams a tumawag iti toll-free hotline ti gobyerno iti 1326.
