LAOAG CITY – Inlawlawag ni Doctor Norman Rabago, ti Covid-19 Consultant ditoy probinsya ti schedule iti panagbakuna kadagiti nagduduma a barangay ditoy probinsya.
Daytoy ket kalpasan a kwinestyunaran ti konseho ditoy ciudad no apay a naud-udi dagiti barangay ditoy ciudad a nakaisayangkatan ti panagbakuna kontra iti covid-19 virus.
Segun ken ni Rabago, ti sursuruten da ket ti Order of Priority nga indatag ti Department of Health (DOH).
Kuna na a ti 3 ribo a bakuna ket kurang pay a para kadagiti adda iti priority list kas kadagiti frontliners, health care workers ken dadduma pay.
Gapu iti daytoy, inbaga ni Rabago a saan koma nga agil-ilem dagiti dadduma no maud-udi da a mabakunaan kontra iti covid-19 virus.
Mainaig iti daytoy, inpakaammo ni Rabago a masapol a suruten da ti pammilin ti DOH no siasinno dagiti rebbeng na a mabakunaan nga umuna.
Inyarig ni Doctor Rabago a no ti inbaga ti DOH a mabakunaan ket dagiti health care workers ngem nagbakuna da ti senior citizen ken madi ti epekto na iti maseknan ket isuda ti agsungbat wenno akinbasol.
