LAOAG CITY – Umanamong ni Mrs. Aubrey Marie Wasay, education program supervisor ti DepEd Division idiay ciudad ti Batac iti pannakaaprubar ti Anti-Palo Bill iti Kamara.
Segun ken ni Wasay, masapol nga igetan pay dagiti mangisursuro ti pasyensa da tapno saan nga aglabsing iti nasao a gakat.
Inbatad na nga addan to latta ti pagnaan wenno pagbanagaan ti awan sarday na a pammagbaga kadagiti ubbing.
Inlawlawag a no dadduma ket agbirbirok laeng dagiti ubbing ti ayat ken pannakaawat isut gapo na a makaaramid dagitoy ti saan a kayat dagiti mangisursuro.
Kunana nga adda pay ti sabali a napinpintas a wagas tapno madisiplinaan dagiti ubbing.
Nupay kasta, inbatad na a kas maysa nga ina ket adda latta ti gundaway a mabaot na ti anak na ngem pakaisurwan ti ubing.
Mainaig iti daytoy, umanamong met ti maysa pay a school head iti nasao a gakat ken kunana a dagiti mangisursuro ket isuda ti maikadwa a nagannak dagiti ubbing.
Innayon na a gapo ta naaprobaran daytoy iti Kamara ket masapol a suruten dagiti maseknan a mangisursuro ti No Touch Policy tapno saan da a maisagmak.
