LAOAG CITY – Inlawlawag ni Mrs. Cherrie Joy Garma, ti Information Officer iti DepEd-Ilocos Norte a mausar latta ti School on Wheels iti laksid a nangrugin ti pannakaipatungpal ti limitado a face to face classes.
Daytoy ket kalpasan a naiyawat iti Deped ditoy probinysa ti School on Wheels nga indonar ti Energy Development Corporation (ECD).
Inbatad na a nangrugi ti proyekto iti pannakaipatungpal ti distance learning iti kangitingitan ti pandemya.
Ti School on Wheels ket addaan ti computer wenno laptop nga usaren dagiti mangisursuro iti Schools Division ti Ilocos Norte kangrunaan na dagiti mapmapan kadagiti nasusulinek a lugar.
Inbatad na nga uray in-inoten nga agsubsubli dagiti estudayante kadagiti pagadalan ket napateg latta ti akem ti School on Wheels kangrunaan na kadagiti adayo a lugar ti probinsya.
Dinakamat ni Garma a dakkel a makatulong daytoy kadagiti kaprobinsyaan a marigatan a sumrek kadagiti pagadalan.
Iti baet daytoy, kunana a maragsakan a nangrugin ti maikadua a bansada ti limited face to face classes ditoy probinsia pakairamanan ti Ilocos Norte College of Arts and Trades, Ilocos Norte National High School, Gabu Elementary School, Shamrock Elementary School, Bacsil Elementary School ken dadduma pay.
Mangnamnama ni Garma nga agtultuloyen ti pannakaisayangkat ti limited face to face classes ditoy probinsya.
