LAOAG CITY – Nagpanawagan ni Pinoy Workers Party-list Rep. Karl Legazpi iti Philippine National Police (PNP), Department of Education (DepEd) ken Commission on Higher Education (CHED) a siguradoen nga ammo ti publiko nangruna kadagiti agad-adal dagiti school safety hotlines ken pagannurotan iti panag-report ti pangta a kinaranggas wenno risgo.
Kiddaw daytoy ni Legazpi kadagiti otoridad ken dagiti maseknan nga ahensia kalpasan a balligi a nalappedan ti maipagarup a pangta ti maysa a menor de edad a panangatake iti maysa a pagadalan idiay Leyte.
Inbatad ni Congressman Legazpi a nasken a maipakaammo iti publiko aglalo kadagiti estudiante no ania dagiti mapagat-atapan a garaw, aramid, mensahe ken aktibidad a nasken nga i-report-da kadagiti otoridad.
Kunana a masapul nga agbalin a nalawag a ti panag-report kadagiti suspicious activities wenno panangipaay ti impormasion kadagiti otoridad ket saan a maibilang nga akusasion no diket panagan-annad ken panangipaay ti proteksion iti tunggal maysa.
