LAOAG CITY – Mamati ni Atty. Donato Balderas Jr., ti Schools Division Superintendent iti Department of Education – Ilocos Norte a makastrek iti Palarong Pambansa ti Schools Division Office ti Ilocos Norte.
Segun kenkuana, daytoy ket kalpasan nga adda dagiti sumagmamano nga atleta ti nakagun-od ti balitok a medalya manipod iti nasao a Schools Division Office.
Inbatadna a nupay man adda dagiti sports events nga awan ti entry ti Schools Division Office ti Ilocos Norte kas ti boxing ket saan nga agpaudi dagiti pambato nga umaayam a makagun-od ti medalya.
Inlawlawagna nga apaman a makastrekda iti Palarong Pambansa ket kasapulanda pay nga adalen dagiti dadduma pay nga istratehia a nagkurangan dagiti atleta nga isu ti nangitunda ti pannakaabakda kadagiti dadduma nga ay-ayam.
Kunana a sipod pay kadagiti naglabas a tawen ket adda latta ti puesto ti Schools Division Office ti Ilocos Norte a mangipaneknek a napipigsa ken narigat nga atiwen dagiti pambatoda nga umaayam.
Innayonna a dakkel a pammadayaw ti Schools Division Office ti Ilocos Norte ti aniaman a magun-odna a puesto iti Region 1 Athletic Association.
