LAOAG CITY – Pabor ni Schools Division Superintendent Dr.Joan Corpuz idiay ciudad ti Batac iti “No Homework Policy”.
Segun kenni Corpuz, napintas ti nasao a nailungalong gapu ta maikkan ti oras dagiti ubbing nga aginana kalpasan ti lima nga aldaw a panagadal da.
Kunana a pudno nga adu dagiti aktibidad iti pagadalan nga aramiden dagiti ubbing rason a kasapulanda ti aginana tapno makasaganada para iti sumaruno nga aldaw.
Malaksid iti daytoy, adda pay ti oras a makatulong dagiti ubbing kadagiti nagannak kas kadagiti trabaho iti uneg tu balay.
Inbatad ni Copuz nga ad-adda a maipokus dagiti ubbing ti panagadalda no awan unay ti panpanunotenda a maubra sakbay da nga agawid.
Innayonna a kaamak na dagiti ubbing a mapan kadagiti nagduduma a lugar tapno laeng agaramid ti assignment.
Mainaig ti daytoy, inbatad ni Mr. Rene Castillo, mangisursuro iti Ilocos Norte College of Arts and Trade ditoy ciudad ti Laoag a pabor iti “No Homework Policy”.
Inlawlawag ni Castillo a pabor nga awan ti maited nga assignment no weekends ngem saanna kayat a sawen nga awanen ti maited nga assignment ti weekdays.
Inkonsiderarna ti posible a dakes nga epekto ti nasao a lungalong kas iti rason dagiti ubbing a patyen met dagiti nagannak.
Innayonna a kalikagum dagiti nagannak a tarabayen dagiti annakda nga agubra ti assignment.
Kabayatanna, saan met nga umanamong ni Ms. Aileen Gail Loloquisen, Federated President ti Parents, Teachers Association gapu ta no awan ti ited nga assignment kadagiti agad-adal ket sumadot dagiti ubbing.
Inbatadna nga ibilangna met a quality time da nga agi-ina ti panangaramid dagiti homeworks.
Segun iti Federated President, dakkel a tulong ti panangaramid ti assignment gapu ta maikkan ti advanced nga adal wenno ideya para iti sumaruno a klase.
