LAOAG CITY – Inpakaammo ni Dr. Rodrigo Catcatan, mangidadaulo ti City Health Office nga agtultuloy ti screening para iti Human Immunodeficiency Virus ditoy siudad ti Laoag.
Segun kenkuana, ti kangrunaan a maipadalan iti screening ket dagiti amin nga empleado ti lokal a gobierno ditoy siudad pakairamanan dagiti maduktalanda nga agpospositibo ti Tuberculosis.
Mainaig iti daytoy, nagpanawagan ni Dr. Catcatan kadagiti addaan ti sakit nga Human Immunodeficiency Virus a saanda nga agpangadua ken agbuteng a mapan iti opisinada gapu ta libre ti maipaay kadakuada nga agas ken confidential ti pakabigbiganda.
Kabayatanna, agtultuloy nga ar-aramiden ti nadakamat nga opisina ti makibinnulig iti Mariano Marcos Memorial Hospital and Medical Center iti siudad ti Batac para iti Info Education Campaign tapno maballaagan ti publiko no kasano a maala, malapdan ken maitrato a normal dagiti tao a positibo iti Human Immunodeficiency Virus.
