LAOAG CITY – Ginisa dagiti senator-judge ti hostile witness a ni Office of the Vice President (OVP) Special Disbursing Officer (SDO) Gina Acosta iti agtultuloy nga interjections iti maika-17 nga aldaw ti impeachment trial kontra ken ni Vice President Sara Duterte.
Rinugian ni Senator-Judge Francis “Kiko” Pangilinan ti panagsaludsod kenkuana no maibilang nga opisial a disbursement ti panagited ti confidential funds ken ni Col. Raymund Lachica, wenno ti umno a disbursement ket ti mismo a panagbayad kadagiti confidential informant ken operasion.
Mainaig iti daytoy, inpetteng ni Acosta a disbursement manipud iti partidona ti panag-release ti pondo ken ni Lachica, no sadinno ket inadmitirna nga obligasionna daytoy kas accountable officer.
Kalpasan iti daytoy, Kwinestion met ni Senator-Judge Erwin Tulfo no apay a saan a binallaagan ni Acosta ni Lachica ken ti Bise Presidente mainaig iti maipagarup anomalia a nagan kas kada “Piattos,” “Chipi Mcdonald” ken “Belat” a naisubmitir iti liquidation report para iti Commission on Audit (COA).
Pinasarunuan pay ni Senator-Judge Erwin Tulfo ti saludsodna no ibilang ni Acosta ti bagina kas “smart, average wenno limitado laeng ti ammona ” no sadinno ket sinungbatan daytoy ti testigo nga ibilangna ti bagina kas “average.”
Gapu iti daytoy, inpetteng ti senador a ti maysa a gagangay nga indibidual ket agsaludsod kadagiti peke a nagan iti Acknowledgement Receipts.
Malaksid kadagiti dua a Senador, nadismaya met ni Senator-Judge Panfilo “Ping” Lacson iti nagbalin a sungbat ni Acosta gapu iti maipagarup awan ti maalana a nalawag a sungbat kalpasan ti nadubli-dubli a panagrason ti testigo mainaig iti panangibilinna ti confidential and Intelligence funds ken ni Lachica kalpasan ti pammilin ni Duterte.
Kabayatanna, binukirad ni Senator-Judge Joel Villanueva ti nagbalin a kalakaran ni Acosta sipud nagbalin daytoy kas Special Disbursing Officer iti Davao City Mayor’s Office agingga iti Office of the Vice President.
Iti kaudian, inadmitir ni Acosta iti panagsaludsod ni Senator-Judge Risa Hontiveros nga ammona nga isuna ti maipilaan ti reklamo no mapaneknekan ti anomalia iti panagusar ti pondo, ngem inpanagetgetna ti pammatina ken ni Vice President Duterte.
