LAOAG CITY – Naragsak nga inpakaammo ni Mr. Cesar Bucsit, ti Department of Education Regional Administrative Officer V ken Region 1 Athletic Association Meet Official Spokesperson a nakagun-od ti Schools Division ti City of Batac ti kaunaan a gold medal iti maudi nga aldaw ti pannakaisayangkat ti Region 1 Athletic Association Meet.
Segun kenkuana, mabalin met pay a manayunan daytoy gapu ta adu pay dagiti ay-ayam a pagbibinnalubalanda.
Inbatadna a maibasar iti Game Results as of 1pm ita nga aldaw, nagtalinaed nga adda latta iti umuna a puesto ti Pangasinan II, maikadua iti puesto ti Laoag City, maikatlo iti puesto ti Ilocos Norte ken adda iti maikapat a puesto ti Ilocos Sur.
Kunana a nakagun-od ti Pangasinan II ti 57 a gold, 39 a silver ken 40 a bronze medals, iti Laoag City ket nakaala ti 48 a gold, 35 a silver ken 49 a bronze medals, iti Ilocos Norte ket nakaibulsa met ti 38 a gold , 43 a silver ken 39 a bronze medals idinto nga iti Ilocos Sur ket nakagun-od ti 22 a gold, 13 a silver ken 29 a bronze medals.
Mainaig iti daytoy, inlawlawagna a bayat a maisursurat daytoy a damag ket adda laeng siam a gold medals ti kamaten ti Laoag City kontra iti Pangasinan II tapno maagaw ti umuna a puesto.
Inbinglay ni Mr. Bucsit nga addan dagiti sumagmamano nga atleta a sumrek iti Palarong Pambansa ngem masapol pay a dumalan iti Regional Screening and Accreditation Committee para iti naan-anay a pannakatingitingda.
Innayonna nga adda ti maiyuswat a Recognition Ceremony inton bigat para kadagiti pito nga Schools Division Offices a maibilang a Top Performing Delegations para iti Region 1 Athletic Association Meet.
Kabayatanna, naammoan a ball games laengen ti maisayangkat inton bigat nga ay-ayam para iti championship.
