LAOAG CITY – Saan a nagpangadua ni Mr. Francisco Jose, maysa a seaman nga inpaima iti Philippine National Police dagiti sumagmamano a paltog na sakbay ti panagsarabu ti baro a tawen.
Daytoy ket uray adayu pay nga agngudo ti lisensya dagiti paltog na.
Immunan nga insuko ni Jose ti 12 gauge shotgun ken maysa caliber 38 revolver nga agpada nga expire intono Abril 14, 2020.
Segun kenni Jose, indeposito na dagiti paltog na iti PNP tapno maliklikan ti desgrasya.
Kuna na nga umabot iti 20 a tawen nga agig-iggem ti paltog ken damo na nga isuko iti PNP dagiti armas.
Inbatad ni Jose a naallukoy ti rikna na a nangisuko dagiti paltog na gapu ti kampanya ti PNP agraman dagiti pasamak ti pannakatama ti naiwawa a bala.
Innayon na a maysa a nakallukoyan na ket ti pammalagip ti Iglesia ni Cristo iti panangisuko da kadagiti armas nga ikikotan da.
