LAOAG CITY – Kinumpirmaran ni Police Lt. Wyrlo Gatoc, deputy chief of police iti CIDG, a negatibo ti resulta ti operasyon kalpasan a naiserbi ti search warrant kontra kenni Pancho Villanueva, iti Brgy. 47 Bengcag ditoy siudad ti Laoag.
Kuna na a rimwar ti search warrant gapu kadagiti maipagarup a report nga adda ti ikot na a paltog.
Nailanad iti search warrant a maipagarup nga adda ti ikot ni Villanueva a kalibre 45 a paltog agraman dagiti bala na ken maysa a long firearm.
Inbatad ni Datoc nga awan ti record na ni Villanueva iti pulisya.
Kabayatanna, inbunannag ni Villanueva a riri iti daga ti uliteg na ken ti pannakapangta na ti namunganayan ti naiyuswat a search operation iti pagtaengan na.
Daytoy ket mainaig idi nagreport iti barangay seknan ti pannakaipatakder LPG facility iti Sitio 5, ti maipagarup a pannakapangta na a mapapatay babaen iti barangay chairman iti Brgy. Nalbo ditoy siudad, ken iti panagturong ni Barangay Kagawad Jimmy Mariano iti lugar da.
Kuna ni Villanueva, manarimaan ti panagdalus na iti lote ti uliteg na idi ta dimteng ti kapitan ti Brgy. Nalbo a pagtaltalawen na daytoy ken nagpangta kontra kenkuana.
Inbatad na a nagturong pay ni Mariano a nakaiggem ti buneng ken nakisarita kenkuana a mapukan ti poon ti Sarguelas iti lote ti uliteg na.
Inpetteng ni Villanueva nga adda ti last will and testament ti pimmusay nga uliteg na a mangibagbaga a naipatawid kenkuana ti lote.
Nupay kasta, adda met ti ipakpakita ni Mariano a deed of sale a ginatang na ti nasao a lote iti agnagan ti Victor Albano a maipagarup a kabagyan ti uliteg na.
Kabayatanna, kuna ni Villanueva a babaen ti panagnegatibo ti operasyon ket pammaneknek nga awan dagiti ik-ikotan na nga iligal a paltog.
