LAOAG CITY – Nagballigi ti inyuswat a search warrant operation dagiti otoridad iti balay da dati a barangay kagawad Valentin Atzuara ken ti kabsat na a ni dati a chief tanud Willie Atzuara iti Barangay Pagsanjan Sur, Badoc, Ilocos Norte.
Naala iti balay ni Valentin Atzuara ti maysa nga improvised shotgun idinto a nakumpiskar met dagiti otoridad iti balay ni Willie Atzuara ti maysa a granada ken maysa nga improvised shotgun.
Nupay kasta, agpada a naglikudan dagiti agkabsat nga Atzuara dagiti ebidensya a naala iti pagtaengan da.
Inpetteng ni Valentin Atzuara a saanna a kukua ti naala improvised shotgun iti pagyanan ti pinggan na.
Inpetteng met ni dati a chief tanud Willie Atzuara iti Barangay Pagsanjan Sur, Badoc, Ilocos Norte a saanna a bagi dagiti naala nga ebidensya kontra kenkuana.
Reaksyon na daytoy kalpasan a nakaala dagiti otoridad iti uneg ti balay na iti maysa nga improvised shotgun ken maysa a granada.
Segun ken ni Willie Atzuara, pwinersa dagiti otoridad ti simrek iti balay da kangrunaan na iti kwarto da ken maipagarop a tinutukan da pay ida ti paltog.
Innayon na a bayat ti panangparuwar kadakuada dagiti otoridad ket adda ti nakita na nga inpisuk da iti durabox ngem inyakar da iti maysa a kabinet da.
Kabayatanna, ibilang ni Police Senior Inspector Joseph Tayaban, ti chief of police iti Badoc, Ilocos Norte kas ‘self-serving’ ti alegasyon kadakuada dagiti agkabsat a subject ti search operations a da dati a barangay kagawad Valentin Atzuara ken ti kabsat na a ni dati a chief tanud Willie Atzuara iti Barangay Pagsanjan Sur, Badoc, Ilocos Norte.
